Улаанбаатар хотын зарим дүүргийн олимпиадад нэг ангилалд нэг сургуулиас олон сурагч оролцох боломжгүй байдгаас үүдэн дүүрэг болон дараа, дараагийн шатны олимпиадад зарим бэлтгэгдсэн сурагчид оролцох боломжгүй байв. Энэ асуудлыг шийдвэрлэх зорилгоор 2017 оны I, IX саруудад ММОХ-ноос зохион байгуулж олимпиадад идэвхитэй оролцдог сургуулиудын дунд хэлэлцүүлэг өрнүүлсэн юм. Эдгээр хэлэлцүүлгээс гарсан санал дээр үндэслэн УБ оноо тооцож ашигладаг болсон.
Математикийн олимпиадад тогтмол амжилттай оролцдог сурагчдыг шалгаруулж хот, улсын олимпиадын эрх олгоход чиглэж байна.
Уламжлалт хэлбэрээр зохион байгуулагддаг багш, эцэг, эхчүүдийн дунд нэр хүндтэй олимпиад байх шаардлагатай. УБ оноо олгох олимпиадуудыг хичээлийн жилийн эхэнд зохион байгуулдаг ММОХ-ны эцэг, эх, багш нартай хийх уулзалтаар сонгож баталгаажуулдаг.
УБ оноотой олимпиадуудыг зохион байгуулах ажилд ММОХ-ын зүгээс ямар нэг хэлбэрээр оролцдоггүй бөгөөд зөвхөн дүнг нэгтгэж тооцох ажлыг зохион байгуулж байна.
| № | Нэр | Хугацаа | Тайлбар |
|---|---|---|---|
| 1 | Бага сунгаа | 2019.10.26 | 31-р сургууль зохион байгуулсан. |
| 2 | Сайн гараа | 2019.11.23 | 11-р сургууль зохион байгуулсан. |
| 3 | Эхлэл сургуулийн нэрэмжит олимпиад | 2019.12.07 | Эхлэл сургууль зохион байгуулна. |
| 4 | Тусгаар Тогтнолын Олимпиад | 2019.12.14 | Үндсэн даваа. Олонлог сургууль. |
| 5 | Орчлон сургуулийн нэрэмжит олимпиад | 2020.02.08 | Орчлон сургууль зохион байгуулна. |
| 6 | МУБИС-ийн деканы нэрэмжит олимпиад | 2020.03.14 | МУБИС зохион байгуулна. |
| 7 | Их сунгаа | 2020.03.21 | 1-р сургууль зохион байгуулна. |
| 8 | Хотын олимпиад | III улирлын амралт. | ММОХ, Нийслэлийн боловсролын газар хамтарч зохион байгуулна. БСШУС-ын яамнаас хугацааг тогтооно. |
УБ оноог 2017-2018 оны хичээлийн жилд хотын олимпиадын эрх олгоход, 2018-2019 оны хичээлийн жилд улсын олимпиадын эрх олгоход ашигласан. Энэ хичээлийн жилийн хувьд УБ оноог хот, улсын эрхийн аль алиныг нь олгоход ашиглана. Хотын олимпиад хүртэлх УБ оноогоор хотын эрх олгох ба хотын олимпиадаас олгох УБ оноог оролцуулж тооцон улсын олимпиадын эрх олгоно.
| Олимпиадын нэр | Ангилал | Эрхийн тоо | Тайлбар |
|---|---|---|---|
| Хотын олимпиад | 7-12-р анги | 20 хүртэл | Хэрвээ урьд нь эрх авсан сурагч УБ оноогоор эхний 20-д орсон бол дараагийн сурагчид эрх шилжихгүй. |
| Улсын олимпиад | 9, 10-р анги | 15 хүртэл | Хэрвээ урьд нь эрх авсан сурагч УБ оноогоор эхний 15-д орсон бол дараагийн сурагчид эрх шилжихгүй. |
| Улсын олимпиад | 11, 12-р анги | 12 хүртэл | Хэрвээ урьд нь эрх авсан сурагч УБ оноогоор эхний 12-д орсон бол дараагийн сурагчид эрх шилжихгүй. |
7, 8, 9-р ангийн сурагчдын хувьд тухайн олимпиадад эзэлсэн байрыг нь харгалзан 20 хүртэлх оноогоор; 10, 11, 12-р ангийн сурагчдын хувьд 15 хүртэлх оноо олгож байна. Ижил оноо авсан сурагчдын хувьд тэдгээрийн эзэлсэн байрын (15-аас их бол 15-аар тооцно) арифметик дундажтай тэнцүү оноо олгоно. Жишээ нь 10-р ангийн 4 сурагч 13-16-р байрт оноо тэнцсэн бол тэдгээрт 13, 14, 15, 15 гэсэн оноо харгалзуулж УБ оноог (13+14+15+15)/4=14.25 гэж тооцно. Сурагчдын УБ оноо тэнцсэн тохиолдолд олимпиадуудад авсан нийлбэр оноогоор эрэмбэлж байр эзлүүлнэ.
Хот, улсын олимпиадаас өмнө тус сайтад гарсан дүнтэй холбоотой ямар нэг санал, хүсэлт ирүүлээгүй бол дүнг хүчинтэйд тооцох бөгөөд аливаа маргаантай асуудал гарсан тохиолдолд багш, сурагчдыг оруулцуулсан хурал зарлаж дүнг баталгаажуулна.